» » Kamaz Azərbaycanda yeni istehsal perspektivlərini araşdırır.
Kamaz Azərbaycanda yeni istehsal perspektivlərini araşdırır.

Kamaz Azərbaycanda yeni istehsal perspektivlərini araşdırır.Azərbaycanın İqtisadiyyat naziri Şahin Mustafayev Rusiyanın “KAMAZ” ASC-nin baş direktoru Sergey Koqoqinlə görüşüb.
Nazirlikdən verilən məlumata görə, görüşdə nazir Şahin Mustafayev ölkərimiz arasında əməkdaşlığın bütün sahələrdə inkişaf etdiyini, əlaqələrin genişlənməsinin Azərbaycan və Rusiya prezidentlərinin siyasi iradəsinin göstəricisi olduğunu vurğulayıb.
Ş.Mustafayev Gəncə avtomobil zavodunun Rusiyanın “Kamaz” və “Ural” zavodları ilə əməkdaşlığı məsələsinin müzakirə edildiyini diqqətə çatdırıb.
Qeyd edilib ki, 2015-ci ilin fevralında “KAMAZ” ASC ilə “Gəncə avtomobil zavodu” İB arasında əməkdaşlıq haqqında müqavilə imzalanıb. Bu müqaviləyə uyğun olaraq, Gəncə avtomobil zavodunda “Kamaz” avtomobillərinin yığımı həyata keçirilir.
Azərbaycanda qeyri-neft sektorunun, o cümlədən qeyri-neft sənayesinin davamlı olaraq inkişaf etdiyini vurğulayan Ş.Mustafayev əməkdaşlığın inkişafı üçün potensialı qeyd edib.
Rusiyanın “KAMAZ” ASC-nin baş direktoru S.Koqoqin “KAMAZ” avtomobillərindən hazırda dünyanın 80-dən çox ölkəsində istifadə edildiyini, MDB ölkələrində “KAMAZ” ASC-nin 40-dan artıq servis xidmətinin fəaliyyət göstərdiyini bildirib.
Azərbaycan bazarının əlverişli olduğunu diqqətə çatdıran S.Koqoqin qeyd edib ki, “KAMAZ” ASC Azərbaycanda kənd təsərrüfatı texnikası və kommunal istifadə olunan nəqliyyat vasitələri istehsal edə bilər. Bundan başqa, yeni nəsil “KAMAZ” avtomobilləri üçün Bakıda və regionlarda servis xidməti yaradıla bilər.
Görüşdə əməkdaşlığın genişləndirilməsi, bir sıra ehtiyat hissələrinin Azərbaycanda istehsalının təşkili imkanları müzakirə edilib.